Dostunu müdafiə etmək istəyən gəncə hökm oxunub.

Bakı Ağır Cinayətlər Məhkəməsində xuliqanlıq niyyəti ilə adam bıçaqlamaqda təqsirləndirilən 1993-cü il təvəllüdlü Ağasalı Xəlilzadənin cinayət işi üzrə məhkəmə iclası keçirilib.

Hakim Azad Məcidovun sədrliyi ilə keçirilən məhkəmə iclasında hökm oxunub. Hökmə əsasən X.Ağasalı 7 il müddətinə azadlıqdan məhrum edilib.

İttihama görə, hadisə 21 oktyabr 2017-ci il tarixində Sulutəpə qəsəbəsində baş verib. Ağasalı Xəlilzadə tanışları Müşfiq Qədirov və qardaşı Elxan Qədirovla kafedə çay içərkən aralarında mübahisə yaranıb. Mübahisə davaya çevrilib və Ağasalı Xəlilzadə kafedən götürdüyü bıçaqla qardaşlardan birini bıçaqlayıb və hadisə yerindən qaçıb. İttihamda cinayətin baş vermə səbəbi gənclər arasında borca görə yaranmış mübahisə göstərilir.

Ona qarşı Cinayət Məcəlləsinin 126.2.4-cü (xuliqanlıq niyyəti ilə qəsədən sağlamlığa ağır zərər vurma) maddəsi ilə ittiham irəli sürülüb.

A.Xəlilzadə elan edilmiş ittihamla özünü təqsirli bilib.

Məhkəmədə sərbəst ifadə verən A.Xəlilzadə deyib ki, hadisədən bir neçə gün əvvəl həmin kafeyə çay içmək üçün gedib. Onunla birlikdə dostu Müşfiq də olub. Kafedə çay içən zaman Müşfiq çölə çıxıb.

Həmin vaxt polis əməkdaşları Müşfiqi polis bölməsinə aparanda Ağasalı da getmək istəyib: “Kafedə oturmuşdum. Ofisiant dedi ki, mənimlə birlikdə gələn Müşfiqi polislər aparır. Mən də arxasınca çıxdım ki, görüm nə məsələdir? Müşfiqlə çörək kəsmişik, dostuluğumuz olub. Onu tək qoymaq istəmədim. Mən də onunla getmək istədim. Polislər məni də maşına mindirdi. Bölməyə apardılar. Bir gün orada saxladılar. Müşfiqin qardaşı bölməyə gəlmişdi. Bizə yemək, siqaret gətirmişdi. Mənim heç bir günahım yox idi. Müşfiqin məsələsini həll elədikdən sonra bizi buraxdılar. Bölmədən çıxanda Elxan mənə dedi ki, guya məni polisdən çıxaranda 60 manat xərc çəkib. Həmin pulu da yeməyə, siqaretə xərcləyib. Mənim də 10 manatım var idi. Verib dedim ki, qalanını da verərəm. Amma söz vermədim, dedim ki, olanda verəcəm. Bundan sonra mənə neçə dəfə zəng elədi. Pulunu istəyirdi. Bir dəfə də məni döymüşdü. Sonuncu dəfə Elxan məni yenə söhbətə çağırdı. Pulunu istəyəndə mən də “yoxumdur” dedim. Mənə kəllə atdı, sonra da yumruq vurdu. Dedi ki, “pulu ver”. Mən də dedim ki, qardaşına görə içəri düşmüşəm. Dedi ki, “mənə dəxli yoxdur. Gətir pulu ver”. Məni vurmağa davam edəndə kafenin həyətində masanın üstündəki bıçaqla onu vurdum”.

X.Ağasalı dostları arasında "Baboş" ləqəbi ilə tanınıb.

Sonxeberler.info